Возбудувањата во Општинската фудбалска лига Прилеп влегуваат во завршница, откако се познати двојките за полуфиналето кое ќе го одлучи новиот шампион и патник во Трета лига – Југ.
Во првиот полуфинален натпревар ќе се соочат Стрела од Ерековци и Динамо од Мажучиште. Овој дуел е закажан за среда (6 мај) на Градски стадион „Гоце Делчев“ со почеток од 17 часот.
Вториот полуфинален меч ќе се одигра ден подоцна, во четврток (7 мај), кога силите ќе ги одмерат Кадица и Кадино. И овој натпревар ќе се игра на истиот стадион со почеток од 17 часот.
Победниците од овие две полуфинални пресметки ќе обезбедат место во големото финале, кое е закажано за 13 мај, исто така на Градски стадион „Гоце Делчев“. Победникот од финалето ќе се закити со титулата шампион на ОФЛ Прилеп и ќе обезбеди пласман во Трета лига – Југ за следната натпреварувачка сезона.
Покрај борбата за титулата, вниманието ќе биде насочено и кон баражот за влез од Б во А квалитетната лига. Во овој дуел ќе се сретнат Братство од Големо Коњари и Прилеп Сити, а натпреварот е закажан за недела од 17 часот на Градски стадион „Гоце Делчев“.
Во меѓувреме, некогашниот второлигаш Братство од Житоше веќе обезбеди директен пласман од Б во А квалитетната лига за следната сезона. На клубот му беше доделен пехар, кој го врачи комесарот за натпреварување при ОФС Прилеп, Љубе Ристевски.
Фудбалската треска во Прилеп расте, а љубителите на спортот со нетрпение ги очекуваат решавачките натпревари кои ќе го дадат новиот шампион и патник кон повисок ранг.
