По историскиот пласман во финалето на ЕХФ Европскиот Куп, ракометарите на Охрид немаат многу време за славје. „Гладијаторите“ веднаш се насочуваат кон новите предизвици, овојпат на домашната сцена, каде ги очекуваат клучни натпревари во плеј-офот од Супер лигата.
Следен предизвик за охриѓани е дуелот против Алкалоид – натпревар кој доаѓа во густ распоред и бара максимална физичка и ментална подготвеност. Тимот ќе мора брзо да се регенерира по напорните европски пресметки, но и да го задржи победничкиот ритам.
Средниот бек на Охрид, Тилен Стрмљан, очекува тежок натпревар против квалитетен противник, потенцирајќи дека клучно ќе биде тимот да се освежи и подготви за нова битка. Тој верува дека мечот ќе биде неизвесен и интересен, а воедно упати повик до навивачите да дојдат и да дадат поддршка, која, според него, ќе биде од големо значење за тимот.
„Повторно нè очекува еден тежок натпревар против екипата на Алкалоид. Имаме напорен ритам на натпревари, така што прво мораме да се регенерираме, па во вторник да покажеме срце на терен. Натпреварот ќе биде интересен, затоа ги повикувам нашите навивачи да ни се придружат и да ни пружат поддршка која сигурно ќе ни биде потребна.“- изјави Стрмљан.
Јасно е дека по европскиот успех, Охрид ќе се обиде да го пренесе позитивниот моментум и на домашната сцена, каде секој бод во плеј-офот може да биде пресуден.
Натпреварот меѓу Алкалоид и Охрид се игра во вторник (05.05) во салата „Автокоманда“ со почеток од 18:00 часот.
