Охрид избори историско финале во ЕХФ Европскиот куп, а значаен придонес во драматичната победа над Целје имаше Тилен Стрмљан, кој натпреварот го заврши со перфектен учинок од седум погодоци.
По натпреварот, во изјава за Спортска Мрежа, средниот бек на Охрид- Стрмљан истакна дека двомечот со Целје бил исклучително тежок и изедначен, при што нијанси решавале за победникот. Тој нагласи дека Охрид имал и доза на среќа во пенал-серијата, но упати пофалби за противникот, додавајќи дека тимот ќе се обиде максимално подготвен да влезе во финалето против фаворизираната Татабања.
„Двата натпревари од двомечот со Целје беа доста тешки и изедначени, така што навистина на крајот имавме среќа вечерва со пеналите. Им честитам на Целје, одлична екипа се, навистина одиграа два феноменални меча. Им посакувам многу среќа понатаму. Ние, имаме време до финалето, Татабања уште од почетокот на овој Куп е фаворит..немаме што да загубиме – со добра подготовка и давајќи го максимумот од себе, ќе се обидеме да победиме и во финалето.“- изјави Стрмљан за Спортска Мрежа.
Охрид со голема самодоверба ќе го дочека финалниот двомеч со Татабања, со јасна цел – борба за европскиот трофеј.
