Охрид се пласираше во финалето на ЕХФ Европскиот куп, откако по драматичен реванш и пенал-рулет го елиминираше Целје.
По натпреварот, пивотменот на охриѓани- ЏанФранко Прибетиќ, во изјава за Спортска Мрежа посочи дека зад тимот се два исклучително тешки натпревари, кои оставиле и физички и психички замор, но и големо задоволство поради поддршката од публиката и пласманот во финалето. Тој додаде дека фокусот сега се префрла на обврските во домашното првенство и подготовката за финалниот двомеч со Татабања.
,, Два многу тешки натпревари се веќе зад нас, секако дека сме и физички и психички исцрпени. Мило ни е заради градот, сите овие луѓе кои нè бодреа и што ни овозможија да стигнеме до финале. Далечен ни е патот до финалето, нè чекаат обврските од домашното првенство, имаме уште натпревари но ќе се подготвиме најдобро што можеме. Во финалето нè чека екипата на Татабања, една одлична екипа и доста сериозна..па мораме да се „ресетираме“ и со нетрпение го чекаме тоа финале, па да покажеме што можеме.”- изјави Прибетиќ за Спортска Мрежа.
Охрид го очекува историски двомеч против Татабања на крајот од мај, во кој македонскиот тим ќе има шанса да стигне до европски трофеј. До тогаш, фокусот останува на домашното првенство и одржување на формата за најголемиот предизвик во сезоната.
