Еурофарм Пелистер останува доследен на својата стратегија за развој и интеграција на млади таленти во првиот тим. Клубот и оваа сезона продолжува со промоција на ракометари од развојниот состав Еурофарм Пелистер 2 во екипата која се бори за највисоките цели.
Најново име кое добива шанса во сениорскиот тим е младинскиот репрезентативец Ненад Белистојаноски. Десното крило од сезоната 2026/27 ќе го носи дресот на шампионот на Македонија, откако потпиша договор со клубот до јуни 2028 година.
Белистојаноски има 21 година, роден е во Прилеп, но неговиот ракометен развој е целосно врзан за Битола, каде ги помина сите категории и постепено се изгради во сериозен потенцијал. Со континуирана работа и напредок, тој заслужено стигна до прагот на сениорскиот состав.
Од клубот изразуваат голема доверба во неговиот потенцијал, очекувајќи да биде важен дел од иднината на тимот, но и кандидат за настап во сениорската репрезентација на Македонија.
Младиот ракометар ќе им се приклучи на новите соиграчи на јулските подготовки, додека неговото официјално претставување како член на Еурофарм Пелистер е планирано на стартот од подготовките за новата сезона.
