Со убедлива и доминантна игра, екипата на Проект го декласираше Кеги Моби во финалето од Купот на Македонија, триумфирајќи со високи 8:3 и со тоа ја освои Куп титулата, комплетирајќи ја двојната круна оваа сезона.
Натпреварот започна во знакот на тимот од Јосифово. По само пет минути игра, радовишанецот Горан Стојанов го отвори резултатот за 1:0, а веќе во 10. минута Бојан Јанев ја искористи грешката во одбраната на велешани и зголеми на 2:0.
Проект продолжи со силното темпо, а по одлична акција и индивидуален продор, искусниот Мартин Тодоровски погоди за 3:0. Веднаш потоа, истиот играч асистираше за вториот гол на Горан Стојанов, кој донесе убедливи 4:0.
Лошата игра на Кеги Моби го натера тренерот Панче Нанев да побара тајм-аут во обид да го консолидира тимот, кој веќе беше во сериозна резултатска криза. Сепак, доминацијата на Проект продолжи, и покрај неколкуте одлични интервенции на голманот Иван Стојановски – Шбава, кој спречи уште поголема негатива.
До крајот на првото полувреме, Горан Стојанов комплетираше хет-трик, а Трајче Трајков погоди за ублажување на 5:1 на полувреме.
Во вториот дел, Никола Анчевски ја продолжи гол-серијата за 6:1, додека Кеги Моби успеа да намали преку Кирил Ивановски за 6:2. Сепак, Проект не застана – Анчевски повторно беше прецизен за 7:2, а Ивановски со својот втор гол намали на 7:3.
Конечниот резултат го постави Ѓорги Коцевски во самата завршница за убедливи 8:3 и големо славје на тимот од Јосифово.
Проект ја завршува сезоната без пораз, играјќи атрактивен и ефикасен футсал под водство на Игор Димов. Со освоените шампионска титула и Куп, тимот заслужено ја потврди својата апсолутна доминација на домашната сцена.
Двојната круна сосема заслужено заминува во Јосифово.
