Младиот спортист од Кратово, Валентино Јовановски, на само 17 години направи вистински подвиг и привлече внимание на спортската јавност. На настанот „Superior Runs“ во Штип, тој истрча 5 километри носејќи панцир на себе од 10 килограми, тестирајќи ја сопствената физичка и ментална издржливост.
Јовановски важи за една од најголемите спортски надежи во Кратово, со веќе забележителни успеси во различни дисциплини, нешто што ретко се гледа за негова возраст. Тој е исклучително физички подготвен, активен и посветен спортист, а настапува и за КМФ Кратово.
Со овој потег уште еднаш покажа дека границите се поместуваат со напорна работа, дисциплина и силна волја, поставувајќи висок пример за младите спортисти од неговиот град и пошироко.
„Ова беше мојот прв маратон кога почнав да трчам; оваа година повторно се вратив – посилен и поодлучен. Уште еднаш си докажав дека границите се само во главата, а дисциплината ги руши. Овие 5 км ги истрчав за 23 минути и 50 секунди со 10 кг панцир, тестирајќи ја својата издржливост до крај. Мисијата е завршена со силно темпо – чекор по чекор, без откажување, ги остварувам своите цели“, вели Јовановски.
