Струга Трим Лум денеска на домашен терен го пречекува Силекс и ќе се обиде да го поправи впечатокот од последните натпревари пред својата публика. Стружани ги загубија последните две средби на домашен терен, од Тиквеш (1-2) и Работнички (1-2), па дуелот со Силекс е важен и од тој аспект, покрај борбата за третата позиција.
Тимот од Струга има седум бода предност токму пред четвртопласираниот Силекс, а со евентуална победа би ја зацврстил таа позиција на табелата.
„Подготвени сме за добар натпревар и се надеваме дека ќе ги освоиме трите бода. Во последниот период имавме лоши настапи пред домашните гледачи и мислам дека им должиме едно квалитетно издание. Верувам дека ќе одиграме на потребното ниво и дека на крајот ќе се радуваме“, изјави Басиру Компаоре.
Натпреварот меѓу Струга Трим Лум и Силекс е со почеток од 13:00 часот, на Градскиот стадион во Струга.
