Екипата на Башкими, по поразот од Струга Трим Лум и суспензијата на стадионот во Куманово, се наоѓа во тешка ситуација во борбата за избегнување на зоната на бараж. Сепак, распоредот не им оди во прилог на кумановци, бидејќи во следните кола ги очекуваат дуели со екипите кои се борат за шампионската титула – Шкендија и Вардар.
Според Мухарем Мислими, денешниот натпревар во Тетово против Шкендија претставува вистинска „борба на гладијатори“, во која двете екипи влегуваат со целосно различни амбиции.
„Натпреварот во Тетово ќе биде најтешкиот за нас оваа сезона, бидејќи играме против екипа за која победата е императив. Со отсуството на двајцата централни дефанзивци и капитенот Арменд Алими поради картони, оваа средба за нас е мисија која, доколку успешно ја завршиме, со златни букви ќе биде запишана во клупските анали. Очекувам гладијаторска борба – едната страна се бори за титула, а другата за спас од баражот“, изјави Мислими.
Во досегашните 15 меѓусебни пресметки меѓу овие две екипи, поуспешна е Шкендија со вкупно 8 победи. Трипати славеше екипата на Башкими, додека 4 натпревари завршија нерешено. Оваа сезона „црвено-црните“ од Тетово доминираа во двата претходни дуели (победа од 5-1 во Тетово и 3-1 во Куманово) и во денешниот натпревар влегуваат како апсолутни фаворити.
Натпреварот ќе се игра на градскиот стадион во Тетово, со почеток во 16.00.
