Дебитантот во Првата македонска фудбалска лига, екипата на Арсими денес со убедлив триумф од 5:1 го декласираше Шкупи за отварање на 29. коло.
Екипата на Вилдан Салиу сега е на чекор до опстанок во елитата, бидејќи направи посериозна разлика од бараж зоната.
Арсими сега е шести со 38 бодови, дури пет повеќе од Брера Струмица која е осма со 33 бодови, но секако дека кога ќе се комплетира колото може да се случи да се намали таа бодовна предност, но во секој случај ова за Арсими е голем чекор кон опстанокот.
Арсими сега го скокна Башкими на табелата и има 38 бодови за шестото место на табелата. До комплетирање на колото Арсими има десет бодови повеќе во однос на зоната за директно испаѓање. Арсими дури сега е во ситуација да игра и за петтото место, бидејќи ако Тиквеш загуби на гостувањето кај Вардар, тогаш тимот од Кавадарци ќе има само два бода предност, а потоа ќе следува пресметката на Тиквеш и Арсими за петтото место.
Арсими до крајот ќе игра со Тиквеш, потоа следува дербито со Башкими, мечот со Силекс и во последното коло со Струга Трим Лум.
