Актуелниот шампион Шкендија направи важен чекор кон финалето во Купот на Македонија, откако на домашен терен со 3-2 славеше против Шкендија Арачиново во првиот полуфинален дуел.
Натпреварот започна идеално за тетовци, кои уште во раната фаза добија пенал, а сигурен реализатор беше Трумчи за водство од 1-0. Домашниот тим имаше можност и да ја удвои предноста, но не успеа да ја искористи.
Гостите од Арачиново не се предадоа и во средината на првото полувреме израмнија преку Амир Нухија, кој погоди со глава по добро уфрлување. Пред самиот крај на првиот дел следеше целосен пресврт, кога Фикрет Ливарека со ефектен погодок донесе предност од 1-2 за второлигашот.
Во второто полувреме фаворитот ја презеде иницијативата и успеа да го врати резултатскиот баланс. Ване Крстевски во 54. минута израмни на 2-2, а комплетниот пресврт беше заокружен во 70. минута, кога Мелиќи ја затресе мрежата за конечни 3-2 по асистенција од Красниќи.
До крајот двете екипи имаа свои моменти, но резултатот не се промени. Патникот во финалето ќе биде познат по реваншот, кој е закажан за 6 мај.
