В среда фудбалерите на Охрид го играат историското полуфинале во Купот на Македонија против Силекс на стадионот „Билјанини Извори“.
„Рибарите“ кои во четвртфиналето преку пенал рулетот го исфрлија ланскиот освојувач на Купот, Вардар, сега одат по нова историја, влез во големото финале.
Добра вест е што Охрид успеа да ги исполни сите услови и полуфиналниот натпревар да го игра на домашен терен односно на стадионот „Билјанини Извори“.
Клубот повикува дека време е за историја и за силна поддршка од трибините за првиот меч од полуфиналето против Силекс.
„Во среда со почеток од 12:00 часот на стадионот Билјанини Извори во Охрид ќе се одигра полуфиналето од македонскиот куп против екипата на Силекс. Ја повикуваме охридската публика во што поголем број да ја поддржи екипата во историското полуфинале“, се вели во соопштението на ГФК Охрид.
Влезот за полуфиналето е 200 денари. Вториот полуфинален меч е закажан за 6 мај и ќе се игра во Кратово.
