Македонските одбојкари Александар Љафтов и Владо Милев се дел од завршницата на унгарската Екстралига, каде се играат полуфиналните и финалните натпревари од плејофот.
Љафтов со својот тим Елоре обезбеди пласман во финалето, откако со максимални три победи (3:1, 3:0 и 3:1) ја добија серијата против Престиж. Македонскиот репрезентативец беше стабилен во сите натпревари и постигна 7, 10 и 13 поени по меч.
Во големото финале, кое започнува на 29 април, Елоре ќе се соочи со Капошвар, кој во три натпревари го елиминираше тимот на Владо Милев, Казинбарчика. Милев доби поголема шанса само на последниот дуел, каде запиша шест поени. Казинбарчика ќе се бори за третото место против Престиж, во серија која стартува на 23 април.
Поради распоредот на завршницата во Унгарија, постои голема веројатност дека Љафтов, а можеби и Милев, ќе ја пропуштат првата репрезентативна прозивка во Крушево на почетокот на мај.
