Кожуф и Беласица ремизираа без голови (0-0) во натпреварот од 25. коло во Втората лига, одигран во Струмица, при што двата тима ги поделија бодовите.
По средбата, клубот од Гевгелија излезе со реакција до јавноста, изразувајќи незадоволство од судењето и одлуките на арбитрите, за кои сметаат дека директно влијаеле на резултатите во повеќе натпревари.
„Како клуб и денес сме оштетени од страна на судиите на мечот против Беласица во Струмица. Денес одново ни беше поништен чист гол од страна на главниот судија Марјан Дејаноски, како и претходно кога на неколку натпревари бевме оштетени во ситуации кога ни биле поништени чисти голови како што беше случајот кога гостувавме во Новаци. Ваквите одлуки на судиите директно имаат влијание врз бодовното конто, бидејќи нашиот тим загуби драгоцени бодови со кои сега би биле во погорниот дел од табелата“, се вели во соопштението на ФК Кожуф, испратено до редакцијата на Спортска Мрежа.
По реакцијата шефот на стручниот штаб Иван Варадиновски и неговиот помошник Трајче Ников прво добија жолт картон, а потоаи црвен.
Во следното коло, Кожуф ќе настапи на домашен терен против екипата на Шкендија Арачиново.
