Охрид утре ќе игра историско финале во Купот на Македонија против Вардар, со јасна цел – да се заокружи една од најуспешните сезони во клупската историја. По одличната форма и серијата позитивни резултати, охриѓани со голема самодоверба влегуваат во борбата за трофејот.
Левиот бек на Охрид, Дејан Кукуловски, во изјава за Спортска Мрежа го најави историското Куп- финале на својот тим. Најпрво, тој истакна дека пласманот во финалето е историски успех за клубот, но и резултат на напорната работа и одличната атмосфера во тимот.
„Најпрво, голема чест и задоволство е што за првпат во историјата на клубот сме дел од финалето на Купот. Ова е резултат на напорната работа, дисциплината и посветеноста на целиот тим. Во добра форма сме, врзавме серија победи на повеќе фронтови – во Суперлигата, Купот и во ЕХФ Купот, што секако позитивно влијае на нашата самодоверба и атмосферата во екипата. Дополнително, двете победи против шампионот Еурофарм Пелистер ни даваат уште поголема самодоверба.“
Во продолжение, Кукуловски се осврна на финалниот дуел со Вардар, нагласувајќи дека тимот е подготвен за предизвикот и верува во своите квалитети.
„Утре нè очекува тежок натпревар против Вардар, кој има искуство и квалитет, но ние сме максимално подготвени. Клучно ќе биде да останеме фокусирани, дисциплинирани во одбраната и трпеливи во нападот. Веруваме во себе и во тимот, сигурни сме дека имаме квалитет и дека секој од нас ќе го даде својот максимум и ќе се бори до крај. Големата поддршка од трибините ќе ни биде дополнителен мотив.“- изјави Кукуловски за Спортска Мрежа.
Финалето е закажано за недела од 20:00 часот во Струмица, каде Охрид ќе има шанса да испише историја и да го освои првиот трофеј во Купот на Македонија.
