Охрид прв обезбеди пласман во финалето на Купот на Македонија, откако одигра доминантен натпревар против Еурофарм Пелистер. По мечот, за Спортска Мрежа, тренерот на охриѓани- Борис Ројевиќ го анализираше полуфиналниот дуел и изрази големо задоволство од изданието на својот тим.
Ројевиќ најпрво се осврна на самиот натпревар, нагласувајќи дека неговите ракометари одиграле дисциплинирано, со јасна контрола и верба во сопствените квалитети.
„Одигравме навистина квалитетен натпревар и можам да бидам многу задоволен од изданието на моите ракометари. Покажаа голема енергија, дисциплина и карактер од првата до последната минута. Знаевме дека нè очекува тежок меч против исклучително квалитетен противник како Еурофарм Пелистер, но верувавме во себе и во тоа што го работиме. Искрено, очекував понеизвесен натпревар, особено по мечот во Битола, но момците од самиот почеток наметнаа ритам и контрола на играта. Кога играме вака фокусирано и борбено, можеме да се носиме со секого.“
Во продолжение, стратегот на Охрид зборуваше за одличната атмосфера во тимот, серијата позитивни резултати и амбициите за продолжението од сезоната.
„Се наоѓаме во многу добра серија и она што ме радува најмногу е атмосферата во тимот. И покрај повредите на Борозан и Петриќ, момците даваат и повеќе од максимумот – би рекол 120%. Тоа го покажува нивниот карактер и заедништво. Во клубот и во градот сите дишеме како едно и навистина го живееме овој сон. Оваа сезона веќе е историска за Охрид, како во Европа, така и сега во Купот на Македонија. Што се однесува до амбициите, тие секогаш се највисоки – одиме на победа во секој натпревар. Не се оптоваруваме однапред со трофеи, но сигурно ќе дадеме сè од себе за да постигнеме што поголем успех.“- изјави Ројевиќ за Спортска Мрежа.
Охрид ја продолжува одличната серија резултати и со голема самодоверба ќе влезе во финалниот натпревар, каде ќе има можност да го круниса историскиот успех со освојување на трофејот во Купот на Македонија.
