Охрид испиша историја и ќе игра историско финале од Купот на Македонија, откако го декласираше Еурофарм Пелистер со 26:19 во полуфиналето.
Голманот на „гладијаторите“ Бојан Блажески вели дека за овој голем триумф клучна била одбраната, а дополнува дека нападот бил перфектен.
„Честитки до Пелистер за фер и коректната игра, честитки до нашите момци. Мислам дека денес одигравме еден од подобрите натпревари оваа сезона, одбраната беше клучна за денешната победа, Пилиповиќ беше исто одличен на голот, нападот функционираше перфектно. Со Коуске мислам дека имаме уште можност да го унапредиме тој напад, секако тој е нов и малку и со јазикот има проблеми, но мислам дека ќе биде перфектно. Сега чекаме да видиме со кого ќе играме во неделното финале со подобриот од Алкалоид и Вардар. Но, секако за нас оваа е историја и понатаму секоја победа е испишана историја за Охрид“, вели голманот на Охрид, Бојан Блажески.
