Главниот град на Македонија ќе биде домаќин на клучен состанок за иднината на ракометот во регионот. На 19 април 2026 година, во хотел „Хилтон“ во Скопје, ќе се одржи третиот состанок поврзан со формирањето на регионалните натпреварувања – Men’s & Women’s Regional Handball League (MRHL / WRHL).
На овој значаен настан ќе присуствуваат претставници на ракометните федерации и клубови од Македонија, Србија и Црна Гора, а дополнителна тежина му дава и присуството на потпретседателот на ЕХФ, Предраг Бошковиќ.
Главните теми на состанокот ќе бидат насочени кон финализирање на форматот и календарот на натпреварување, утврдување на финансискиот и организацискиот модел, како и јасно дефинирање на улогите на федерациите и клубовите. Посебен акцент ќе биде ставен и на заедничкиот развој и координација на ракометот во регионот.
Според плановите, новата лига ќе стартува со 11 машки и 8 женски екипи, што претставува сериозна основа за подигање на квалитетот и конкурентноста.
Со оваа иницијатива, Ракометната федерација на Македонија се позиционира како двигател на регионалната соработка и отвора ново поглавје во развојот и афирмацијата на ракометот на Балканот.
