Екипата на Беласица оствари убедлива победа на гостувањето во Прилеп, откако славеше со високи 0:5 против Победа, но натпреварот ќе остане запаметен и по уште еден важен момент – дебито на двајца млади фудбалери од сопствениот младински погон.
Шанса за настап добија Петар Трендов и Осман Томе, двајцата родени 2008 година, кои веќе подолг период се дел од тренажниот процес со првиот тим. Трендов настапува на позицијата во средниот ред, додека Томе игра во дефанзивата, и со својот настап го означија почетокот на една нова генерација која чука на вратата на сениорскиот состав.
Од клубот потенцираат дека покрај нив, уште неколку млади фудбалери се во исчекување на својата шанса, што јасно говори за насоката во која се движи Беласица.
Овој потег е доказ дека тренерот Панче Стојанов, заедно со стручниот штаб и претседателот Славчо Васков – Пинда, имаат јасна визија и сериозна доверба во развојот на младите играчи и иднината на клубот.
Со вакви резултати и вложување во сопствениот кадар, Беласица испраќа силна порака дека гради стабилна и перспективна екипа за периодот што следува.
