Вардар стигна до минимална, но значајна победа од 1:0 над Работнички во градската пресметка од 27. коло во Првата македонска фудбалска лига. Човек на одлука беше Стефан Цветковиќ, кој во 23. минута со одлично изведен слободен удар, со помош на дирекот, ја затресе мрежата на противникот.
Иако натпреварот не понуди висок ритам, двете екипи имаа свои шанси. Работнички се закани преку Омерагиќ и Мухарем, додека Вардар можеше и порано да поведе. Во второто полувреме најголемата можност за израмнување ја имаше Мерџани, но неговиот обид го сопре Талески. До крајот, „црвено-црните“ не дозволија изненадување и ги освоија трите бода.
Во Кратово, Силекс ја продолжи победничката серија, откако со 1:0 го совлада Башкими и ја запиша третата победа во низа. Иако резултатот е минимален, домаќините имаа далеку повеќе од играта и создадоа бројни шанси.
Во првиот дел најактивен беше Додев, кој неколкупати се закани, но без реализација. Башкими се разбуди во финишот од полувремето, но Џеков беше сигурен на голот. Во вториот дел притисокот на Силекс продолжи, а клучниот момент се случи во 66. минута кога Личина направи прекршок како последен играч, заработи црвен картон, а домаќините добија пенал.
Одговорноста ја презеде Додев, кој во 68. минута сигурно реализираше од белата точка за водство и, како што се покажа, конечен резултат. До крајот Силекс создаде уште неколку прилики, но резултатот остана непроменет.
Со овие три бода, Силекс останува во трката за висок пласман, додека Вардар со триумфот во дербито доби дополнителен мотив во продолжението од сезоната.
