Радовиш утрово официјално влезе во фудбалски ритам, откако на Градскиот стадион започна „Велигденски турнир 2026“ во организација на ФК Детонит – Плачковица (пионерски категории).
Уште од раните утрински часови терените се исполнети со енергија, детска радост и фудбалска страст, а над 450 млади фудбалери од Македонија, Србија и Бугарија се дел од овој голем настан.
Покрај домаќинот Детонит Плачковица, на турнирот учествуваат и екипите на Беласица, Мал Ајакс, Биџо, Работник Галактикос, Раидерс, Нови Талиенти, Албион, Осогово, Марадона, ГФК Неготино, Брера, Либра Кидс, фудбалската школа Радисављевиќ, како и фудбалскиот клуб Христов, што му дава дополнителна тежина и квалитет на натпреварувањето.
Турнирот се игра во повеќе возрасни категории (2013, 2014, 2015, 2016, 2017 и 2018), со прилагоден формат на игра, кој овозможува развој, фер-плеј и уживање за најмладите.
Овој настан не е само спортско натпреварување, туку и вистински празник на фудбалот, каде се создаваат нови пријателства и се градат спортски вредности.
Ова е уште една потврда на одличниот раст и развој на клубот и ангажманот на управата на чело со претседателот Јовица Трајчев, каде покрај првиот тим фокусот е и на младинскиот погон.
Медиумски покровител на турнирот е Спортска Мрежа, која ќе обезбеди целосно следење со информации, фотографии и содржини директно од терените.
Со ваква масовност и организација, Радовиш уште еднаш потврдува дека е важен центар на младинскиот фудбал во регионот.
Ваков турнир се одржува за првпат во Радовиш, а полните трибини на Градскиот стадион се потврда дека радовишани сакаат да следат вакви настани и истите ги поддржуваат.
