Во рамки на 24. коло од Втора македонска фудбалска лига, екипата на Шкендија Арачиново утре гостува кај Осогово во Кочани, во натпревар кој носи големо значење за двете страни.
Станува збор за дуел на две екипи кои се во одлична форма и имаат високи амбиции. Домашниот состав е во серија позитивни резултати и го напаѓа петтото место на табелата, додека гостите од Арачиново се во трка за влез во елитата и ќе бараат нови бодови за задржување на врвот.
Првото нивно соочување сезонава заврши со минимална победа од 1:0 за Шкендија Арачиново, но овојпат условите се поинакви. Осогово сезонава покажа дека е исклучително силен домаќин – на истиот терен загубија лидерот Охрид и Беласица, а тимот од Кочани впиша и убедливи победи против Детонит Плачковица (2:4) и на гости кај Брегалница (0:2).
Шкендија Арачиново, пак, пристигнува со импресивна форма – четири победи и едно реми во последните пет натпревари, а дополнителна сигурност дава голманот Антонио Столевски, кој има пет натпревари по ред без примен гол.
Табелата дополнително ја зголемува важноста на овој дуел. Шкендија Арачиново го дели првото место со Охрид и Брегалница со по 52 бодови, додека Осогово е шести со 43 и останува во трка за петтата позиција на Беласица, која има 45 бодови.
Иако гостите имаат поискусен состав со повеќе звучни имиња, Осогово се потпира на младост и енергија надополнети со неколку искусни фудбалери, со тим кој веќе покажува потенцијал за високи дострели и во иднина.
Останува да се види која тактичка замисла ќе надвладее – онаа на Крсте Крстев или на Берат Имери, и дали домашниот терен и поддршката од „Сејмени“ ќе бидат пресудни, или формата и одбранбената стабилност на Шкендија Арачиново ќе донесат нови бодови во трката за Прва лига.
