По напорниот европски двомеч со Олимпијакос, кој започна со гостување во Атина, а викендов кулминираше со драматичен реванш на домашен терен, ракометарите на Охрид, веќе се насочени кон нов голем предизвик.
Во среда ги очекува дерби пресметка против Еурофарм Пелистер во Битола, меч кој доаѓа во клучен дел од сезоната и може значително да влијае во борбата за што подобар пласман во Супер Лигата. Дополнителен мотив за битолчани е и фактот што во последниот натпревар во ,,Билјанини Извори” доживеаја пораз.
Столбот на одбраната на Охрид, шпанецот Ориол Реј Моралес најави тежок и неизвесен натпревар, потенцирајќи дека се работи за дуел во одлучувачки дел од сезоната. Тој нагласи дека и Охрид и Пелистер се тимови со висок квалитет, па според него, клучот за успехот ќе биде во подготовката и менталниот пристап на екипите.
„Ни следува тежок меч во одлучувачки момент од сезоната. Ние сме два тима кои играме на високо ниво и со добра подготовка и менталитет ќе имаме шанса за победа.“- изјави Моралес.
Охрид влегува во дербито со голема самодоверба по европскиот успех, но и со доза на замор и свесност дека ќе мора да одигра на највисоко ниво против мотивираниот Пелистер, во натпревар кој може да биде пресвртница во домашниот шампионат.
