Репрезентативната пауза тимот на АП Брера ја искористи за целосно ресетирање и квалитетни подготовки за клучниот дел од сезоната, во кој главната цел е обезбедување опстанок во елитното друштво. По двата порази во изминатите кола, избраниците на Мартин Алаѓозовски се надеваат дека следува период на подобри изданија и позитивни резултати.
Денешниот натпревар носи голема тежина, бидејќи во Струмица гостува Арсими – еден од директните конкуренти во борбата за опстанок во Првата лига. Победата би имала огромно значење и би можела да биде пресвртница за продолжението од сезоната.
„Работевме напорно во текот на репрезентативната пауза и се надеваме дека тоа ќе даде резултат на натпреварите што претстојат. Нѐ очекува важен натпревар против Арсими, а ние се надеваме дека ќе одиграме квалитетно и ќе успееме да ги освоиме бодовите“, вели тренерот Мартин Алаѓозовски.
Натпреварот меѓу АП Брера и Арсими е закажан за 15:30 часот, на стадионот „Благој Истатов“ во Струмица.
