Македонската ракометна легенда Стојанче Стоилов од следната сезона ќе биде нов шеф на стручниот штаб на Бутел Скопје, откако потпиша двегодишен договор со суперлигашот. Тој ќе го наследи Горан Кузманоски, кој по крајот на актуелната сезона заминува во странство.
За Стоилов ова ќе биде прв самостоен ангажман како прв тренер, по искуството што го стекна како дел од стручниот штаб на македонската сениорска репрезентација и работата во Вардар. Во Бутел Скопје ќе има можност да започне ново поглавје во кариерата и да гради сопствен тренерски пат.
Зад себе Стоилов има импресивна играчка кариера. Настапуваше за Металург, романскиот Одорхеи и Вардар, каде помина 13 сезони и освои бројни трофеи, меѓу кои две титули во Лигата на шампионите, десет шампионски титули во македонската Суперлига, 11 Купови на Македонија и пет трофеи во регионалната СЕХА лига.
Новиот стратег на Бутел Скопје јасно ги истакна своите планови и визија за клубот.
“Сакам да се заблагодарам за довербата на раководството на Бутел Скопје. Ситуацијата во македонскиот ракомет е чиста – сега имаме четири клубови кои се помоќни финансиски од другите, но за да имаме силна репрезентација, другите клубови треба да се посветат повеќе внимание на македонските млади играчи и да не купуваат странци. Бутел веќе има костур на екипата, иако има и млади ракометари, но тие имаат суперлигашко искуство. Би го надополнил ростерот со млади од други екипи за кои сметам дека може да станат големи играчи. Амбициите остануваат и за наредната сезона – пласман во плеј-офот, само со македонски ракометари”, изјави новиот стратег на клубот.
Задоволство од постигнатиот договор изрази и претседателот на клубот, Бојан Спасовски, кој потенцираше дека изборот паднал на вистинско решение.
“Баравме идеално и квалитетно решение за клупата на Бутел Скопје. Имавме краток состанок со Стоилов и веднаш се договоривме. Станува збор за легенда не само во македонскиот ракомет, туку и пошироко. Со него ќе добиеме и на квалитет и на искуство на клупата, а во ростерот и натаму ќе имаме млади македонски играчи. Амбициите ни се високи, па затоа се договоривме за соработка на две сезони. Mу даваме одврзани раце на Стоилов околу формирање на ростерот, а ние како раководство ќе се потрудиме да му обезбедиме максимални услови за работа”, изјави Спасовски.
Со ангажманот на Стоилов, Бутел Скопје јасно покажува дека сака стабилност, развој и амбициозен пристап во наредниот период, со фокус на домашни ракометари и долгорочен напредок.
