Столе Димитриевски: Мора да покажеме дисциплина во дефанзивата и да ги освоиме тие втори топки

Македонската фудбалска репрезентација утревечер ќе гостува во Даблин, каде ќе се сретне со Република Ирска во натпревар меѓу двете селекции кои беа елиминирани во полуфиналето од плејофот за пласман на Светското првенство 2026. По тешкиот пораз од Данска (4:0), следува нов предизвик во кој тимот ќе треба да покаже реакција и подобро издание.

Голманот Столе Димитриевски потенцира дека одбраната мора да функционира беспрекорно, а како еден од клучните фактори го издвојува и освојувањето на таканаречените „втори топки“, кои често знаат да го одлучат текот на натпреварот.

„Јас сум професионалец, секогаш доаѓам да победувам, особено кога играм во дресот на Македонија. Имаме два убедливи порази во последните два натпревари, ги анализиравме грешките и јасно е дека мора да покажеме дисциплина во дефанзивата и да ги освоиме тие втори топки. Доколку бидеме подобри во тој сегмент, ќе имаме повеќе напади од противникот, а ривалите нема да имаат толку удари кон нашиот гол. Работиме, разговараме, анализираме и мора да се подобриме“, изјави Столе Димитриевски.