Младата репрезентација до 21 година утре ќе гостува кај Ерменија во рамките на осмиот натпревар од квалификацискиот циклус за Европското првенство.
Ерменија е единствениот противник што досега го совладавме, а избраниците на селекторот Горан Станиќ веруваат дека во Ереван можат повторно да слават и да го запишат вториот триумф во меѓусебните пресметки.
Натпреварот ќе се одигра на теренот во тренинг центарот на националната асоцијација во Ереван со почеток од 15 часот.
“На дуелот против Ерменците одиме да освоиме три бода. Верувам дека целта може да ја исполниме. Сите фудбалери се подготвени да го дадат максимумот и ќе одиграме на највисоко ниво. Натпреварот со Италија беше огромно искуство за сите нас, тоа е репрезентација што се бори за првото место во групата и е фаворит за највисоката позиција. Сметам дека можеме да ја совладаме Ерменија, но мораме да ги отстраниме сите недостатоци што ги покажавме на мечот во со Италија, особено индивидуалните грешки да ги сведеме на минимум”, изјави Матео Софијановски.
