Во рамки на 3. коло на ЕРС (eFootball Pro Champions) Охрид се соочи со екипата на Локомотива Загреб, во меч кој понуди многу шанси и можности за погодоци, но конечниот исход беше реми без погодоци (0:0) и делба на бодовите.
„Рибарите“ одиграа уште еден квалитетен натпревар и по три кола остануваат непоразени со две ремија и една победа имаат пет бодови на своето конто.
Охрид оваа сезона во ЕРС (eFootball Pro Champions) е застапуван од Иван Иванов – државен шампион во eFootball во Македонија, играч кој потекнува од Радовиш, како и Марко Дринаковиќ, Вук Алексиќ и Милорад Зовичевиќ, а лигата се игра во популарниот 3 на 3 мод.
Во следното коло екипата на Охрид ќе оди по својата втора сезонска победа против тимот на Ксилофагу еспортс од Кипар.
Во рамки на првото коло Охрид одигра 0:0 со Будуќност од Црна Гора, а во второто коло со 2:0 славеше над Тиквеш во македонското дерби.
Натпреварите може да се следат во живот на Arena eSport ТВ каналот, како и на нивниот официјален YouTube канал, а Спортска Мрежа е медиумски покровител на тимот на Охрид.
