Екипата на Младост Богданци утре го игра најважниот натпревар во сезоната против Мулти Есенс, дерби кое директно ќе реши кој ќе обезбеди пласман во Супер лигата.
Младост влегува како непоразен лидер, додека Мулти Есенс има само еден пораз – токму од тимот од Богданци. Влогот е огромен: победникот оди директно во елитата, додека поразениот ќе мора преку бараж да го бара патот кон Супер лигата.
Она што дополнително му дава тежина на дербито е поддршката која Младост ќе ја има од трибините. Богданци е целосно мобилизиран, а силна поддршка ќе пристигне и од Гевгелија, Валандово и Дојран, организирано сите заминуваат кон Скопје, а на трибините ќе им се придружат и сите љубители на Младост кои живеат во главниот град.
Се очекува преполна сала во Автокоманда, жестока атмосфера и натпревар во кој нијанси ќе одлучуваат. Дуелот започнува од 15 часот и веќе сега е јасно дека ќе биде вистински спектакл за македонскиот ракомет.
Едно е сигурно – Младост е решен уште утре да ги реши сите дилеми и четата на Горан Андоновски да обезбеди влез во Супер лигата.
