Македонската машка ракометна репрезентација ги доби противниците во квалификациите за Европското првенство 2028, кое ќе се одржи во Шпанија, Португалија и Швајцарија.
Избраниците на Кирил Лазаров ќе настапат во групата 8, каде ќе се соочат со селекциите на Шведска, Грција и Луксембург. Јасно е дека Шведска важи за фаворит, додека Македонија ќе води директна борба за едно од местата што водат на континенталниот собир.
Квалификациите стартуваат во ноември 2026 година, а ќе се играат во три термини – ноември, март и мај. Македонија ќе го отвори циклусот со домашен дуел против Луксембург, по што следува гостување кај Грција. Двојниот предизвик со Шведска е закажан за март 2027, додека последните две кола се играат во мај.
Пласман на Европското првенство ќе обезбедат првите две селекции од секоја група, како и четирите најдобри третопласирани репрезентации, што дополнително ја зголемува важноста на секој освоен бод.
Континенталниот шампионат во 2028 година ќе се одржи од 13 до 28 јануари, а Македонија ќе се обиде да биде дел од европската ракометна елита и на овој голем настан.
