Непоразениот лидер Младост в сабота ќе гостува во Автокоманда каде ќе ги одигра дербито на сезоната против Мулти Есенс – дерби кое ќе реши кој директно ќе патува во Супер лигата следната сезона.
Младост не знае за пораз, а Мулти Есенс само еднаш загуби, токму од Младост во Богданци со 31:30.
Бразилецот Жоао Габриел Диас Гекас кој го носи дресот на Младост за Спортска Мрежа ексклузивно истакна дека одлично е да се работи со искусен тренер како Горан Андоновски, дополнува дека без разлика на противникот работат напорно, истакнувајќи дека очекува силна поддршка од трибините во Автокоманда.
„Одлично е да се работи со искусен тренер кој беше и одличен спортист. Горан секогаш се обидува да го извлече максимумот од тимот. Работиме напорно секоја недела, без оглед на противникот, и овој натпревар нема да биде поинаков. Одиме во главниот град барајќи ја нашата 18-та победа. Очекуваме секаква можна поддршка надвор од дома. Навивачите се наш осми играч и многу е важно за нас да ја имаме нивната поддршка во еден толку важен натпревар, бидејќи заедно сме посилни“, вели Бразилецот за Спортска Мрежа.
Бразилецот вели дека го анализираат противникот, но ги анализираат и нивните претходните натпревар со цел максимално подготвени да влезат во дербито на сезоната во Автокоманда.
„Да, анализираме, исто како што ги проучуваме нашите противници секоја недела, а ги анализираме и нашите минати настапи и што можеме да поправиме и подобриме индивидуално и колективно. Победата на домашен терен не менува ништо за нас, нашиот фокус е секогаш на следниот триумф. Очекуваме да играме на високо ниво физички, технички и тактички“, ни изјави Диас Гекас.
Мечот меѓу Мулти Есенс и Младост се игра во сабота од 15 часот, тогаш ќе стартува дербито на сезоната и ќе биде даден одговорот – кој директно ќе оди во Супер лигата.
