Познати се двојките за завршницата од Купот на Македонија, а љубителите на ракометот ги очекуваат вистински дерби – пресметки во борбата за трофејот.
Во полуфиналната рунда, РК Охрид ќе се соочи со РК Еурофарм Пелистер во обид да избори пласман во големото финале. Во второто полуфинале, силите ќе ги одмерат скопските ривали – РК Вардар и Алкалоид.
Ждрепката одреди први на терен да излезат Охрид и Пелистер во петок на 17 април од 17 часот, додека три часа подоцна ќе следи и вториот полуфинален дуел меѓу Вардар и Алкалоид.
Финалната пресметка е закажана за недела, 19 април, со почеток од 19 часот, кога ќе биде познат и новиот освојувач на Купот.
Титулата ја брани РК Вардар, кој минатата година триумфираше во финалето одиграно во Охрид, што дополнително го зголемува влогот и неизвесноста за претстојните натпревари.
