Во сабота ќе се одигра дербито на сезоната во Првата ракометна лига меѓу Мулти Есенс и Младост, кое речиси сигурно и ќе реши која од овие две екипи ќе има директен влез во Супер лигата, а која ќе преку потешкиот пат да го бара влезот во елитата, односно преку баражот.
Младост е непоразен лидер, а Мулти Есенс единствениот пораз го има токму од тимот од Богданци кога загуби во гости со 31:30.
Српскиот интернационалец Лазар Адамовиќ кој го носи дресот на Младост од Богданци, за Спортска Мрежа вели дека рецептот за победничката форма се крие во напорната работа на тренинзите и максималното залагање на натпреварите од сите играчи.
„Токму така, Младост не знае за пораз и сите во клубот даваме максимум за така и да остане – од играчите, тренерот и управата. Тој рецепт е напорна работа на тренинзите и максимално залагање на натпреварите од сите играчи. Како што кажавте, дерби и можеби натпревар кој ќе одлучи кој ќе биде прв на табелата. Мулти Есенс е екипа која добро ја познаваме, составена од младински и кадетски репрезентативци, како и од неколку искусни играчи. Ја анализираме веќе подолго време и од полусезоната се подготвуваме максимално за тој натпревар“, изјави Адамовиќ за Спортска Мрежа.
Србинот кој за Младост доста постигна 96 гола вели дека атмосферата во клубот е одлична, вели дека нормално е да постои притисок, но тој притисок кај нив е позитивен.
„Атмосферата во соблекувалната е позитивна, сите сме подготвени, здрави и максимално концентрирани за најважниот натпревар во сезоната. Нормално е да постои притисок пред ваков дерби натпревар, но кај нас се чувствува позитивен притисок и подготвеност да одиграме натпревар во кој ќе одлучуваат нијанси“, дополни Адамовиќ во изјава за Спортска Мрежа.
Дербито меѓу Мулти Есенс и Младост се игра во сабота во Автокоманда со почеток од 15 часот.
