Во сабота од 15 часот, салата во Автокоманда ќе биде центарот на ракометните возбудувања, каде Мулти Есенс го пречекува непоразениот лидер Младост од Богданци во директна пресметка која може да ја реши целата сезона во Првата ракометна лига.
Гостите од Богданци пристигнуваат со јасна цел – да останат непоразени и со тоа практично да го заверaт пласманот во Супер лигата за сезоната 2026/27. Од друга страна, Мулти Есенс ќе се обиде на домашен терен, со силна поддршка од трибините, да му го нанесе првиот пораз на лидерот и да ја направи трката неизвесна до самиот крај.
Интересно е што и покрај гостинскиот терен, се очекува значителна поддршка и за Младост, бидејќи љубителите на ракометот и поддржувачи од Богданци и околината Гевгелија и Дојран сигурно дека ќе допатуваат во Скопје за да го следат дербито и дадат поддршка на Младост.
Математиката е јасна, но и комплицирана – реми му одговара на Младост за задржување на врвот, победа сигурно го носи кон враќање во елитата, додека и минимален пораз може да биде доволен, поради триумфот од 31-30 во првиот меѓусебен дуел. Токму тој натпревар е единствениот пораз на Мулти Есенс оваа сезона.
Сепак, од таборот на Младост не калкулираат – целта е само една, нова победа и потврда на доминацијата. Автокоманда е подготвена за вистински спектакл и дерби кое може да ја одреди судбината на сезоната.
