Младата репрезентација на Македонија до 21 година влегува во нов квалификациски предизвик за Европското првенство 2027, при што ја очекуваат две исклучително тешки гостувања. На 26 март во Емполи, избраниците на Горан Станиќ ќе се соочат со силната селекција на Италија, додека пет дена подоцна, на 31 март, ќе гостуваат во Ереван против Ерменија.
Нашата млада селекција веќе ги започна подготовките, настапувајќи со делумно подмладен состав, но со јасна амбиција – да прикаже поконкурентни изданија и да се избори за позитивни резултати против ривалите.
„Нè очекуваат две исклучително тешки гостувања, но тоа е реалноста во овој квалификациски циклус. Направивме одредени промени и го подмладивме тимот со фудбалери кои ќе бидат носители и во следниот циклус, но и со играчи кои верувам дека веќе сега можат да одговорат на барањата.
Клучно ќе биде да одиграме дисциплинирано, одговорно и борбено. Мора да ги сведеме на минимум индивидуалните грешки што досега скапо нè чинеа и да извлечеме максимум од двата натпревари. Очекувам храбар пристап, без преценување или потценување на противникот, со фокус на нашата игра“, изјави селекторот Станиќ.
Во групата од квалификациите за ЕП 2027, македонската репрезентација во шесте натпревари, запиша домашна победа против Ерменија (2:1). Против Италија, во Битола, загубивме со 0:1.
