Шкупи и натаму ја бара својата прва победа во сезоната, а како што одминуваат колата во домашното првенство, задачата станува сè потешка. Конкуренцијата е силна, бидејќи секоја екипа се бори за своите цели – опстанок, место во Европа или врвот на табелата.
И покрај тешката ситуација, во клубот од Чаир инсистираат на достоинствен настап на секој натпревар, свесни дека сè повеќе се наметнува реалноста за преселба во Втората лига следната сезона. Тренерот Алиса Виши е целосно запознаен со предизвиците и позицијата во која се наоѓа тимот.
„Знаеме дека противникот е фаворит, но ќе влеземе со крената глава како и во секој натпревар, бидејќи сме свесни за нашата ситуација. Подобро во Втора лига, отколку клубот да згасне во Четвртата лига – нешто што никогаш не го заслужувал. Денес ние сме тие што го одржуваме клубот во живот, без интерес и без ниту еден денар. Се надевам дека еден ден трудот на овие дечиња ќе биде награден, бидејќи нивниот придонес е огромен. Токму затоа, ние сме тука за клубот. Респект за екипите од Првата лига кои нè почитуваат. Благодарен сум им бидејќи знаат дека играме со млади фудбалери и ги почитуваат, наместо да ги потценуваат,“ изјави Виши во пресрет на овој дуел.
Натпреварот меѓу Башкими и Шкупи ќе се одигра на стадионот во Куманово, со почеток во 14:30 часот.
