Селекторот на македонската машка ракометна репрезентација, Кирил Лазаров, дополнително го прошири списокот на играчи за претстојната ЕХФ недела и пријателскиот натпревар против Австрија.
Нов повик доби кружниот напаѓач на Вардар 1961, Кристијан Атанасовски, кој за првпат ќе биде дел од сениорскиот национален тим и има можност да дебитира во дресот на Македонија.
Во меѓувреме од комбинација отпадна пивотменот Марко Стојковиќ, а за оваа репрезентативна акција нема да настапат ниту дел од поискусните ракометари, меѓу кои Маркоски, Митревски и Пешевски, како и повредениот Ѓорѓиев.
Македонските ракометари ќе го започнат собирот на 17 март, по што ќе ги стартуваат подготовките за контролниот натпревар против селекцијата на Австрија. Дуелот ќе се одигра на 21 март во Брегенц, а во конкуренција за настап ќе бидат вкупно 19 репрезентативци.
Овој меч ќе биде дел од подготовките на националниот тим пред бараж средбите за пласман на Светското првенство 2027 година.
