Фудбалерите на Шкендија запишаа важна победа во 23. коло од Првата македонска фудбалска лига, откако на домашен терен го совладаа Арсими со минимални 1-0. Херој на тетовци беше капитенот Бесарт Ибраими, кој со одличен погодок го реши натпреварот.
Од самиот почеток Шкендија ја презеде иницијативата и се обидуваше да го наметне својот ритам на игра. Иако во воведните минути немаше многу конкретни шанси, домашниот тим успеа да ја пробие одбраната на гостите во 18. минута. Ибраими прими топка на околу дваесетина метри од голот и со прецизен удар ја затресе мрежата на голманот Ислами за водство од 1-0.
Во продолжението од натпреварот тетовци имаа повеќе од играта и создадоа уште неколку прилики за зголемување на предноста. Се заканија Фабрис Тамба, како и Трумчи со удар од дистанца, но гостинскиот голман успеа да интервенира и да спречи поубедлив резултат.
Арсими во текот на целиот меч се обидуваше да се организира во одбраната, но не успеа да создаде посериозна шанса за израмнување, па Шкендија без поголеми проблеми ја задржа минималната предност до крајот.
Со оваа победа Шкендија останува во трката за шампионската титула и по 23 одиграни кола има три бода помалку од лидерот Вардар, додека Арсими со 26 бодови се наоѓа на осмата позиција на табелата.
