Македонската ракометна сцена викендов ќе биде во знакот на Купот на Македонија во машка конкуренција. Групната фаза ќе се игра во три града, а веќе се дефинирани и салите во кои ќе се водат битките за место на завршниот турнир.
Во Скопје ќе се играат дури две групи. Во СЦ „Јане Сандански“ ќе се одржат натпреварите од групата А, каде се среќаваат Бутел Скопје – Вардар и Мулти Есенс – Еурофарм Пелистер 2.
Паралелно, во салата „Автокоманда“ ќе се игра групата Б со дуелите Пролет – Македонија Ѓорче Петров и Радовиш – Алкалоид.
Во групата В, која ќе се игра во Охрид, во СРЦ „Билјанини извори“, ќе се соочат Тиквеш и Охрид, додека вториот пар го сочинуваат Куманово и Младост Богданци. Победниците од овие два натпревари ќе се борат за првото место во групата и пласман меѓу најдобрите четири.
Битола ќе биде центарот на случувањата во групата Г. Во салата „Боро Чурлевски“ силите ќе ги одмерат Прилеп и Драчево Јуниор, како и Струга против Еурофарм Пелистер.
Фаворитската улога ја имаат токму екипите што ќе настапат на домашен терен. Со оглед на амбициите и квалитетот, нивниот евентуален неуспех да стигнат до Ф4 би претставувал вистинско изненадување. Сепак, Купот традиционално знае да донесе неизвесност и драматични пресврти, што дополнително го крева влогот пред викенд-пресметките.
