Второлигашот Шкендија Арачиново во продолжението од сезоната ќе влезе со нов тренер, откако клубот се раздели со Љупчо Марковски – Калц.
Одлуката за прекин на соработката доаѓа по последните резултати, особено по домашниот пораз од Скопје, кој беше директен ривал во трката за пласман во Првата македонска фудбалска лига. Според информациите, разделбата меѓу двете страни е договорена спогодбено.
Марковски седна на клупата на тимот од Арачиново на почетокот на оваа сезона и успеа да оствари значаен резултат со пласман во полуфиналето на Купот на Македонија, што претставува историски успех за клубот. Покрај тоа, Шкендија Арачиново останува сериозен кандидат и за прволигашка промоција.
По одиграни 18 натпревари во Втората лига, Шкендија Арачиново се наоѓа на втората позиција со 39 бодови, еден помалку од лидерот Охрид, додека Скопје е трет со бод помалку.
До крајот на сезоната тимот го очекува жестока борба за врвот и местата кои водат во елитата.
Во следното коло Шкендија Арачиново ќе гостува кај последнопласираната екипа на Големо Коњари, а во меѓувреме клубот ќе треба да пронајде решение за тренерската позиција пред завршницата на шампионатот.
