ФК Тетекс доби значајна поддршка во клучен момент од сезоната. Тетовскиот второлигаш официјално објави дека управата на клубот постигнала договор за спонзорство со компанијата Супертрејд ДООЕЛ, официјален застапник на светски познатиот бренд Gulf.
Клубот преку соопштение информираше околу постигнатиот договор за спонзорство.
„На наше големо задоволство и со гордост може да ја известуваме јавноста дека управата на ФК Тетекс постигна договор за спонзорство со управата на Супертрејд ДООЕЛ, официјалните застапници за еден од најпрепознатливите светски брендови во енергетскиот сектор, Gulf! Ова партнерство претставува силен чекор напред за нашиот клуб и јасен сигнал дека Тетекс продолжува да расте, да се развива и да гради стабилна иднина. Поддршката од бренд со глобална традиција и реноме како Gulf значи нова енергија, нов импулс и уште поголема мотивација за сите во сино-белиот табор. Тетекс не застанува. Тетекс се издигнува. Со ова спонзорство, отвораме ново поглавје на амбиција, професионалност и победнички дух! Следува период во кој заеднички ќе ја градиме приказната што ќе се памети.“
По 18. коло во Втората лига екипата на Тетекс е на делба на десеттото место со Каменица Саса со по 21 бод во бараж зоната. Ваквите заложби на клубот од Тетово и потврдената соработка со нов сериозен спонзор потврдува дека Тетекс веќе за следната сезона ќе размислува за посериозен пласман и можност „штофарите“ да се вратат во Прва лига.
Веќе в сабота Тетекс ќе гостува во Виница кај отпишаната Слога.
