На иницијатива и лична покана од Зоран Балдовалиев, специјален гостин на Брера Струмица е легендарниот израелски стратег Аврам Грант – поранешен селектор на Израел и поранешен тренер на Челзи, со кој во 2008 година играше финале во Лига на шампиони.
Од клубот информираат дека оваа посета е резултат на визијата, контактите и амбицијата што Балдовалиев ги вложува во развојот на Брера на сите нивоа. Да се донесе светско фудбалско име од ваков калибар во Струмица претставува значаен чекор за клубот и јасен сигнал за неговите идни цели.
Грант денес од ложата го проследи натпреварот против Струга Трим Лум, заедно со Сашко Пандев и Зоран Балдовалиев. Неговото присуство беше дополнителен мотив за фудбалерите да го дадат максимумот на теренот, но и вистинска чест за струмичката публика.
Интересно е што Балдовалиев во својата играчка кариера никогаш директно не соработувал со Грант, но благодарение на широката мрежа на контакти што ја има изградено низ Европа и светот, успеа да обезбеди ваква посета за клубот.
Од Брера порачуваат дека ваквите моменти се потврда дека клубот чекори во вистинска насока. Кога зад еден проект стојат јасна визија, работа и амбиција – границите навистина не постојат.
