Екипата на Света Троица од Охрид, која се натпреварува во Третата лига – Југозапад, забележа убедлива победа во меѓународен пријателски натпревар од контролен карактер, совладувајќи ја германската екипа СВ Јагстцел со 3:1.
Херој на средбата беше новото засилување и повратник во тимот, Никола Угриноски, кој ги постигна сите три погодоци за охридскиот третолигаш. Со одлична реализација и сигурна игра во нападот, Угриноски најави дека ќе биде сериозно засилување за тимот во продолжението од сезоната.
Контролниот натпревар беше добра можност стручниот штаб предводен од Борис Бимбилоски да ја провери формата и подготвеноста на играчите во пресрет на пролетниот дел од шампионатот. Победата против меѓународен противник дополнително ја крева самодовербата во таборот на охридскиот состав.
Света Троица есенскиот дел од сезоната го заврши на седмата позиција со десет освоени бодови, но амбициите за пролетта се далеку повисоки. Тимот влегува во вториот дел од првенството засилен и мотивиран, со јасна цел – подобри резултати и напредок на табелата во Третата лига – Југозапад.
