ГРК Охрид со сигурен чекор го отвори плеј-офот во Супер Лигата со триумф на гостувањето кај Бутел Скопје (28-22). Натпреварот започна малку тешко за охриѓани – првото полувреме беше изедначено и двете екипи покажаа силен отпор. Клучот за победата дојде во вториот дел, кога Охрид ја наметна својата игра и создаде разлика што ја одржа до крајот.
Во изјава за Спортска Мрежа, Даниел Ѓорѓески потенцираше дека клучот бил во одбраната и дисциплинираната игра, што им овозможило да ја исполнат целта – победнички старт во плеј-офот. Голманот истакна дека сега вниманието е насочено кон следните предизвици, вклучувајќи ги Куп-средбите и дуелот со РК Алкалоид.
„Одигравме еден добар натпревар, посебно во одбраната и успеавме да ја оствариме целта- да го отвориме плеј-офот со победа, како што и посакувавме. Сега ни останува добро да се подготвиме за тоа што ни следува – натпреварите од Купот и мечот со Алкалоид, кој е доста важен за нас.“- изјави Ѓорѓески за Спортска Мрежа.
Со оваа победа, Охрид го потврди статусот на фаворит во плеј-офот, демонстрирајќи дека знае да одговори кога е најпотребно и со дисциплина да го контролира текот на натпреварот.
