ГРК Охрид со победа го отвори плеј-офот во Супер Лигата, славејќи на гостувањето кај Бутел Скопје со 28-22. Мечот не беше лесен, особено во првите 30 минути, но охриѓани во продолжението ја наметнаа својата игра. Еден од најрасположените во победничкиот табор, покрај капитенот- Ојлески, беше Дарко Ѓукиќ, кој натпреварот го заврши со шест погодоци.
Во изјава за Спортска Мрежа, српскиот интернационалец потенцираше дека тимот имал проблеми во нападот во првото полувреме, додека одбраната функционирала на посакуваното ниво.
Според него, вистинското лице Охрид го покажал по паузата, кога со подобра реализација и повисоко темпо успеал да создаде доволна разлика за мирен финиш и стартна победа во плеј-офот. Ѓукиќ додаде дека фокусот сега се префрла кон Куп-обврските и дуелот со РК Алкалоид.
„Се мачевме во првото полувреме- најмногу во нападот, додека одбраната беше на ниво, ама во второто полувреме заигравме на нашето ниво и направивме доволна разлика за да започнеме победнички во плеј-оф фазата. Сега се вртиме кон Купот и подготовката за нашиот најважен натпревар- против Алкалоид.“- изјави Ѓукиќ за Спортска Мрежа.
Со ваков пристап и јасна насока кон следните предизвици, Охрид покажа дека знае како да одговори кога е најпотребно – и дека вистинските битки допрва следуваат.
