Кикбокс Маитаи клубот Комбат од Радовиш продолжува со активностите и настапите на домашната сцена, а во фокусот овој викенд ќе биде младиот Трајче Василев.
Деветгодишниот Василев во недела (1 март) ќе настапи на Државното кикбокс првенство на Македонија во Скопје, каде ќе се бори во дисциплината кик лајт до 27 килограми. За него ова е уште една можност да го покаже својот талент и напредок.
Покрај Василев, на првенството ќе настапат и уште тројца членови на клубот: Александар Ивановски во категоријата кик лајт до 74 килограми, Стефан Ефтимов во лоу кик до 81 килограм и Андреј Петров во К-1 до 71 килограм.
Клубот постои веќе 17 години и зад себе има богата историја со настапи на повеќе европски и светски првенства, како и на европски и светски купови, од каде радовишани се враќале со бројни медали. Најраната возраст за запишување е 7-8 години, а во клубот активно тренираат и девојки, меѓу нив и Дебора Димова која две години успешно е дел од клубот.
Кикбокс Маитаи Комбат кој го предводи тренерот Мите Ашкилов располага со сопствена сала за тренинзи во Радовиш, што овозможува континуирана работа и развој на младите таленти, меѓу кои е и Трајче Василев – новото име кое сака да остави трага на домашната сцена.
