Неверојатна атмосфера се подготвува во Охрид за дербито од 17. коло во Втора македонска фудбалска лига. Лидерот Охрид на домашен терен го пречекува второпласираниот тим Шкендија Арачиново во директна пресметка за првото место и чекор поблиску до елитата.
Натпреварот започнува во 14 часот на стадионот „Билјанини Извори“, а се очекуваат полни трибини. Навивачката група „Рибари“ најавува масовна поддршка и вистинска фудбалска еуфорија. Влезницата чини 300 денари, додека за жителите на Охрид со приложена лична карта влезот ќе биде бесплатен.
Дополнителен шмек ќе даде и настапот на Ѓоко Танески, кој во живо ќе ја изведе „Лихнида кајче веслаче“ – химната на охридскиот спорт. Сѐ е подготвено за дерби кое може многу да реши во битката за влез во елитата. Од клубот информираат сите да бидат присутни на стадионот најдоцна до 13:30 часот.
Влогот е огромен – само првопласираниот обезбедува директен пласман во Првата македонска фудбалска лига, додека вториот и третиот ќе мора да играат бараж. Охрид во моментов има 39 бодови и со победа би се одлепил на 42 и би направил значаен исчекор кон директен пласман. Со реми ќе ја задржи предноста од еден бод, а евентуален пораз ќе значи промена на врвот и нов лидер од Арачиново.
