Брегалница во сабота на домашен терен ќе го пречека Вардар Неготино, во обид да се врати на победничките патеки по поразот од Кожуф во минатото коло.
На Градскиот стадион во Штип „сините“ ќе ја имаат фаворитската улога, а целта е јасна – освојување на трите бодови и продолжување на трката за враќање во Првата македонска фудбалска лига.
Голема поддршка се очекува од верните Фаланга и Ултра Банда, која најави мобилизација. Собирот е закажан во 13 часот пред Новата пошта во Штип, со повик сите да бидат облечени во црно. Од таму навивачите заедно ќе се упатат кон стадионот, кој се наоѓа во непосредна близина.
Се подготвува и кореографија, а атмосферата треба да биде дополнителен мотив за избраниците на стратегот Влатко Костов да го заборават киксот во Гевгелија и да продолжат по зацртаниот пат кон елитата.
Натпреварот меѓу Брегалница и Вардар Неготино започнува во 14 часот.
