Тиверија Брера денеска забележа голема победа од 2:1 над актуелниот шампион Љуботен во натпревар од 16. коло на Првата женска фудбалска лига.
Голема заслуга за триумфот имаше голманката Викторија Панчурова, која ја носи и капитенската лента на тимот од Струмица.
По натпреварот, Панчурова, која го чува и голот на македонската репрезентација, истакна дека по поразот од Каменица Саса во претходното коло, успеале за само два дена да се издигнат како тим и да стигнат до голем триумф, нагласувајќи дека е горда на сите девојки.
„Во саботата игравме тежок натпревар на терен кој беше уште по тежок за игра каква што негуваме ние и се соочивме со големи проблеми. Успеавме после два дена да се кренеме и на домашен терен да покажеме дека оваа млада екипа не се плаши од никого и дека баш овде тешко ќе се земаат бодови. Горда сум на сите девојки покажаа дека Македонија има квалитетни млади играчи кои треба да се ценат и почитуваат“, изјави Панчурова во ексклузивна изјава за Спортска Мрежа.
Струмичкиот прволигаш располага со млада екипа која може да игра на високо ниво и рамноправно да се носи со состави што имаат и странски засилувања во своите редови.
„ЖФК Љуботен има многу добра и спремна екипа која што игра на ниво сезонава составена од многу странци но тоа не значи дека предвреме ќе се креваат бели знаменца. Ги почитуваме сите екипи но како што кажав никој лесно нема да помине во Струмица. Ова се за нас многу важни бодови со оглед на тоа што имаме за цел да се задржиме горе на табелата. Сезоната е долга се надеваме дека ќе помине во најдобар ред без повреди и секако интересни натпревари“, дополнува Панчурова.
Тиверија Брера има 30 бодови и го дели четвртото место со Каменица Саса, а во следното коло ќе гостува кај „фенерџијата“ Кочани.
