Фудбалскиот клуб Победа продолжи со натпреварување во Втора македонска фудбалска лига, иако претходно преку официјално соопштение информираше дека поради очајната финансиска состојба не е во можност да ја продолжи сезоната.
Ваквата ситуација го вклучи „црвениот аларм“, по што целиот фудбалски Прилеп се крена на нозе. Во изминатиот период се одржаа јавни собири на кои прилепчани се мобилизираа за спас на клубот и негово продолжување со натпреварување, додека верните навивачи бараат одговорност за тоа како клубот е доведен во ваква состојба.
Има многу отворени прашања – како во иднина ќе се пронајде решение за излез од големите финансиски долгови. Но, Прилеп деновиве е горд на своите млади фудбалери, кои кога е најтешко застанаа зад клубот. Во саботата тие излегоа на терен и го одиграа првиот пролетен натпревар против Новаци. Иако поразени со 0-5, токму тие момчиња се вистинските херои во овие тешки моменти.
Меѓу стативите застана Виктор Анѓелевски (2008), а на теренот беа и Матеј Талески (2008), Давид Паскоски (2008), Давид Здравески (2009), Кренар Сулемани (2009) и Кристи Крајоски (2006), кој ја носеше капитенската лента и воедно беше највозрасниот фудбалер во составот.
Настапија и Димитар Шаркоски (2007), Леонид Митрески (2008), Гоце Кузманоски (2009), Арсениј Солевски (2009), како и Гоце Петрески (2008) и Андреј Петрески (2008).
На клупата за резерви беа Тодор Ѓероски (2008) и тројцата фудбалери родени 2009 година – Далијан Волчески, Филип Петрески и Давид Здравески.
Победа е гордост не само на Прилеп, туку и на цела Македонија. Во периодот што следува, пред клубот стојат сериозни предизвици поврзани со неговата иднина и опстанок, но едно е сигурно – кога е најтешко, младите се тие што покажуваат што значи љубов кон клубот.
